MaltarightNow.com
8 ta' Marzu, 2010
19:16 CET |
Il-Parroċċa tal-Fontana, mmexxija mill-Kappillan il-ġdid Dun Joseph Bajada, ser ittella' kunċert tar-Randan nhar is-Sibt 20 ta' Marzu 2010. Dan il-kunċert qed jittella' b'kollaborazzjoni sħiħa mal-Kunsill Lokali tal-Fontana u qed jiġi organiżżat minn Schola Cantorum Jubilate.
Schola Cantorum Jubilate qed tiċċelebra l-għaxar anniversarju mit-twaqqif tagħha. Matul din is-sena ser jittellgħu diversi kunċerti u avvenimenti mużikali biex jitfakkar dan l-anniversarju. Il-membri ta' dan il-kor jixtiequ jiċċelebraw ma' dawk kollha li tul dawn l-għaxar snin urew apprezzament, offrew għajnuna jew ikkollaboraw għas-suċċess tal-kor. Sa mill-bidunett, Schola Cantorum Jubilate kellha l-għan li tagħti l-kontribut tagħha fil-qasam mużikali lokali u li teduka lill-poplu fejn tidħol il-mużika liturġika. Fil-fatt, il-polifonija sagra tibqa l-ispecjalità ta' dan il-kor. Permezz tal-kant kontemplattiv tagħhom jippruvaw iressqu ‘l-bniedem dejjem aktar lejn Alla.
Il-programm għal dan il-kunċert Hora Gloriæ, jinkludi kant polifoniku a cappella, principalment minn kompożituri bħal: Palestrina, Kodály, Bartolucci, Debono u Portelli. Dawn l-aħħar żewġ kompożituri huma qrib ħafna tal-iSchola Cantorum u huma zgħazagħ li jipromettu. Fil-fatt ser nisimgħu għall-ewwel darba ‘Nunc Dimittis' ta' Mark Debono u ‘Miserere' miktuba għall-sopran u vjolinċell minn Paul Portelli. Din ser tiġi interpretata minn Marouska Attard, sopran u Direttrici tal-kor akkumpanjata minn Jacob Portelli fuq il-vjolinċell. Solo ieħor jinkludi ‘Pie Jesu' ta' Fauré li ser tiġi interpretata minn Anita Vella Bondin. Dr. Joseph Camilleri ser jakkumpanja lis-solisti fuq l-orgni.
Minn barra dawn il-biċċiet mużikali sagri, il-kunċert ser jinkludi meditazzjonijiet miktuba minn qassis Spanjol Fr. José Miguel Ibáñez Langlois fil-ktieb tiegħu ‘Libro de la Pasión' (1986). Dan il-ktieb gie ippublikat diversi drabi u b'lingwi differenti. Jitratta fuq poeżija-rakkont tal-episodji prinċipali tal-aħħar ġrantet ta' Ġesù skont il-vanġelu. Dawn il-ħsibijiet ġew maqluba għall-Malti mill-Kapp. Joseph Bajada.
Kulħadd jista' jattendi għal dan il-kunċert bla ħlas. Aktar informazzjoni fuq www.scjchoir.com.
|
