Ingrid FENECH
8 ta' Frar, 2010
19:51 CET |
L-Istitut tal-Ġurnalisti Maltin, l-IĠM, innota b'dispjaċir li f'dawn l-aħħar ġranet dehru kitbiet stampati kif ukoll fil-media elettronika li setgħu ħolqu ambjent negattiv u inġust għal dawk involuti. Fi stqarrija tal-aħbarijiet, l-IĠM qal li meta l-kitba tkun tattakka b'mod personali u inġust individwi fil-ħajja pubblika u privata tagħhom, dan ma jistax jissejjaħ ġurnaliżmu serju.
L-istqarrija semmiet ukoll kif fl-attakki riċenti kontra l-ġurnalisti li dehru fil-media kien hemm attakki kontra l-Viċi-Chairperson tal-Istitut Julia Farrugia. Għalhekk, l-IĠM xtaq juri solidarjetà ma' dawk kollha li ħassewhom urtati b'dawn il-kitbiet, filwaqt li appella lil dawk il-ġurnalisti u l-kontributuri kollha tal-media biex josservaw ir-regoli tal-etika u jkunu professjonali f'xogħolhom.
L-IĠM żied jgħid ukoll li jemmen li l-Pulizija għandha rwol x'taqdi f'sitwazzjonijiet bħal dawn, ukoll biex kitbiet simili ma jkunux ripetuti.
|
