maltarightnow.com
5 ta' Frar, 2010
20:35 CET |
Wara diversi suċċessi bi produzzjonijiet spettakolari bħal 'Golden Oldies', 'The Legends of Music', 'Dipinto di Blu' u oħrajn, għal darba oħra, Spiteri Lucas Entertainment ser tippreżenta 'In Harmony - Live the Music', spettaklu mużikali uniku li ser jittella' nhar is-Sibt 20 ta' Marzu fit-8 ta' filgħaxija u l-Ħadd 21 ta' Marzu fis-6.30 ta' filgħaxija fit-Teatru Sir Temi Zammit ġewwa l-Università f'Tal-Qroqq.
Il-preparamenti jinsabu fl-aqwa tagħhom u dan l-ispettaklu għandu jitqies bħala wieħed mill-attrazzjonijiet ewlenin għal dan l-istaġun teatrali u ħolqa oħra fil-katina ta' spettakli li ttellgħu b'suċċes minn Spiteri Lucas Entertainment f'dawn l-aħħar sitt snin.
'IN HARMONY - Live the Music' huwa xow 'live' imżewwaq b'kant, mużika u diversi effetti speċjali oħrajn li żgur se joffri spettaklu differenti minn tas-soltu lil kulmin ħa jattendi għalih. L-udjenza ser tittieħed fuq vjaġġ mużikali li matulu ser jiġu interpretati għażla vasta ta' suċċessi mużikali li sawru l-istorja tal-mużika Pop. Ir-repertorju li se jiġi ppreżentat waqt 'dan l-ispettaklu, huwa wieħed vast u jappella għal nies ta' kull età. Biżżejjed insemmu siltiet bħal 'The Circle of Life', 'The Lion Sleeps Tonight', 'That's what Friends are For', 'I Will Follow Him', 'Lady Marmalade' 'Heal the World', 'Any Dream Will Do', 'Miserere', 'Adagio', 'Can't Take my Eyes off of You', 'Bohemian Rhapsody', 'Somebody to Love' u bosta oħrajn.
Dawn il-kanzunetti ser jiġu interpretati minn uħud fost l-aqwa kantanti b'vuċijiet mill-aktar versatili li għandna f'pajjiżna fil-mument u li ntgħażlu minn Spiteri Lucas Entertainment għal din il-produzzjoni. Biżżejjed insemmu lil Ludwig Galea, Nadine Axisa, Pamela, Raquela, Debbie Scerri, Ivan Spiteri Lucas, Glen Vella u Neville Refalo li għandu f'idejh id-direzzjoni ta' kor magħmul minn 40 tifel u tifla u adolexxenti li ħa jkunu qed jakkumpanjaw f'uħud mill-kanzunetti li se jiġu interpretati waqt dan l-ispettaklu. L-arranġamenti mużikali u t-tmexxija tal-mużiċsti li se jdoqqu kollox 'live' huma f'idejn il-mużiċst Mark Spiteri Lucas.
Il-booking għal 'IN HARMONY - Live the Music' jinsab miftuħ u l-biljetti jistgħu jinxtraw mill-booking office tal-Kavallier ta' San Ġakbu, il-Belt Valletta (Tel. 21 223 200) jew online minn fuq is-sit elettroniku www.scjav.org. Il-pubbliku jista' jċempel ukoll fuq hotline 9989 6638 jew 9946 8429. Għal aktar informazzjoni tistgħu żżuru s-sit elettroniku ta' Spiteri Lucas Entertainment, www.spiterilucas.net.
|
