Xogħol fis-sajf għal studenti fl-ICT

Għal sena oħra, l-Aġenzija tat-Teknoloġija tal-Informatika ta' Malta, (MITA), flimkien mal-Ministeru għall-Infrastruttura, it-Trasport u l-Komunikazzjoni niedew l-istudent placement programme għal dawk il-kumpaniji li qed ifittxu ħaddiema fil-qasam tal-informatika u f'oqsma relatati biex jaħdmu matul ix-xhur tas-sajf.

Din is-sena, l-iskema kienet imsaħħa sostanzjalment u saret iktar attraenti għal min iħaddem hekk kif il-Gvern se joħroġ nofs il-paga ta' studenti fl-ICT li jkunu assenjati mal-kumpaniji partikolari.

F'dawn l-aħħar ħames snin, mijiet ta' kumpaniji u studenti gawdew minn din l-iskema. Din l-esperjenza ta' xogħol tinfirex fuq 11-il ġimgħa fuq bażi ta' 30 siegħa fil-ġimgħa bejn Lulju u Settembru b'rata ta' ħlas ta' €5.31 s-siegħa – b'nofshom jitħallsu mill-Gvern.

L-istudenti li jintgħażlu jistgħu jokkupaw diversi rwoli fi ħdan il-kumpaniji li xogħolhom jirrelata mal-ICT u n-negozju.

Min-naħa l-oħra, il-kumpaniji se jkunu qed iħaddmu lil dawn l-istudenti biex jagħtuhom esperjenza ta' xogħol u jinħoloq pont bejn l-aspettattivi tal-istudenti u r-realtajiet li wieħed jiltaqa' magħhom fuq il-post tax-xogħol.

Il-kumpaniji li jixtiequ jippartecipaw f'dan il-programm jistgħu jibagħtu email fuq [email protected] b'indikazzjoni tal-kwalifiki, l-għarfien u ħiliet li qed jirrikjedu u n-numru ta' postijiet miftuħa.

Min-naħa tagħha, il-MITA tibgħat lista speċifika ta' studenti flimkien mas-CV tagħhom. Il-kumpaniji ikunu jistgħu jintervistaw lill-istudenti prospettivi.

Kumpaniji interessati għandhom japplikaw sa mhux iktar tard mill-25 ta' Ġunju.  Studenti li qed isegwu kors relatat mal-ICT fl-Universita' ta' Malta, l-MCAST jew istituzzjoni privata oħra jistgħu japplikaw online fuq is-sit www.mita.gov.mt/spp sa mhux iktar tard mit-18 ta' Ġunju.