Xhieda tas-suċċess tal-imprenditorija

Għall-kumpanija Cuschieri Aluminium u għal mijiet ta' negozji żgħar u medji oħra, ix-xogħlijiet li huma jieħdu u jwettqu fi proġetti tal-gvern huma element vitali u importanti biex ikompli jikbru u jiżviluppaw.

L-opportunitajiet li jirriżultaw għal kumpaniji żgħar u medji meta dawn jieħdu kuntratti marbutin ma' proġetti kapitali tal-gvern jew f'investimenti tal-privat kienu trattati waqt żjara li l-Prim Ministru Lawrence Gonzi għamel fil-kumpanija Cuschieri Aluminium fl-Imrieħel. 

Din il-kumpanija bdiet tletin sena ilu minn ħanut żgħir f'Tas-Sliema iżda llum żviluppat u kibret tant li timpjega 30 ħaddiem u hi nvoluta f'uħud mill-ikbar proġetti tal-gvern fil-pajjiż fosthom l-Isptar Mater Dei. 

Minbarra dan, il-kumpanija rnexxielha tieħu wkoll xogħlijiet fi proġetti oħra bħal Portomaso, Tigne, il-Bank of Valletta u r-Radisson.

Wara li ltaqa' mal-ħaddiema, il-Prim Ministru tkellem dwar l-iskemi li l-gvern qed idaħħal biex jgħin lin-negozji żgħar u medji bħall-micro invest u l-micro credit li minnhom s'issa gawdew mal-1,800 negozju li bejniethom investew mas-sebgħin miljun ewro u ħolqu mijiet ta' impjiegi ġodda. Hu semma li huma dawn l-inizjattivi li qed ikomplu joħolqu l-impjiegi u qed ikomplu jikkonfermaw ix-xejriet pożittivi tal-ekonomija Maltija. Dan tikkonfermah ukoll l-Unjoni Ewropea.

Gilbert Cuschieri, id-Direttur Maniġerjali tal-kumpanija jitkellem dwar kemm huma importanti l-proġetti tal-Gvern għal kumpaniji bħal tiegħu.

Quddiem l-isfidi internazzjonali, l-ekonomija tibqa' tissaħħaħ, propju għaliex is-settur tan-negozji żgħar u mejdi, li huwa sinsla tal-ekonomija, qed jibqa' b'saħħtu u jibqa' joħloq l-impjiegi. Fl-aħħar erba' snin, minkejja l-maltemp ta' madwarna, pajjiżna ħoloq għoxrin elf impjieg ġdid u għandu fost l-inqas rati ta' qgħad fl-Ewropa.