Twissija qabel il-vjolenza

Sar magħruf li sorsi sigrieti Amerikani kienu wissew permezz ta' cable lill-Ambaxxata tal-Istati Uniti fil-Kajr dwar 'ir-reazzjoni vjolenti potenzjali' mill-Musulmani rigward iċ-ċirkolazzjoni ta' clips mill-film Innocence of Muslims li jżeblaħ l-isem tal-Profeta Mohammad, il-fundatur tal-Iżlam.

Il-film qajjem għagħa enormi fid-Dinja Musulmana u kien proprju fl-Eġittu li qamu l-ewwel protesti 'jaħarqu' wara li uffiċjali sigrieti Amerikani infurmaw lill-Ambaxxata tal-Kajr li l-clips maqluba għall-Għarbi kienu qed jitqassmu fuq in-network soċjali.

Il-cable ntbagħat minn Washington fl-10 ta' Settembru, lejlet il-protesti, u għalkemm ma enfasizzax miżuri għal titjib tas-sigurtà, l-uffiċjali tal-Gvern Eġizzjan xorta waħda ġew notifikati dwar it-tħassib tal-Istati Uniti. 

Filwaqt li l-Gvern ta' pajjiż partikulari jrid jaċċerta s-sigurtà tal-missjonijiet diplomatiċi barranin f'artu, ma ntbagħtux kopji tal-cable bl-informazzjoni partikulari lill-missjonijiet l-oħrajn tal-Amerikani fir-reġjun< inkluż il-konsolat tal-Istati Uniti f'Bengażi, fil-Libja. 

Kien proprju f'Bengażi li l-Ambaxxatur Amerikan Christopher Stevens u tliet Amerikani oħra nqatlu fi vjolenza, għalkemm għadha mhix ċara din il-konnessjoni mal-film anti-Musulman inkwistjoni.

Sorsi infurmati jgħidu li l-cable (li għadu klassifikat) għandu l-oriġini f'xandira tan-network tat-televiżjoni Eġizzjan al-Nas li tmur lura għat-8 ta' Settembru fejn il-preżentaturi rreferew għal siltiet ta' film maħdum bl-Ingliż li jħammeġ l-isem ta' Mohammad. Ix-xandira kompliet li 'immigranti Kopti' (membri eżiljati ta' grupp ta' minoranza Kristjana fl-Eġittu) kienu ċċirkolaw il-clips ta' dan il-film 'Amerikan' fuq il-websajt You Tube.