Tnaqqis ta' 0.5% fil-qgħad

Ċifri ppubblikati mill-Eurostat juru li f'Ġunju l-qgħad f'Malta naqas b'0.5% meta mqabbel mal-istess xahar tas-sena l-oħra.

Malta fil-fatt kienet wieħed minn disa' pajjiżi biss tal-UE li fihom naqas il-qgħad. Fi 19-il pajjiż ieħor kien hemm żieda fin-numru ta' nies jirreġistraw għax-xogħol.

Fiż-Żona Ewro fuq sena l-qgħad żdied b'1.2%. Meta wieħed iħares lejn il-blokk kollu Ewropew iż-żieda kienet ta' 0.9%.

Anke fost iż-żgħażagħ, il-qgħad f'Malta kompla jonqos meta fil-bqija tal-Ewropa dan żdied – tnaqqis ta' 2%. Pajjiżna għandu ir-raba' l-anqas rata ta' qgħad fost iż-żgħażagħ Ewropej.

L-akbar żieda fil-qgħad kienet irreġistrata fil-Greċja, fi Spanja u anke f'Ċipru. Spanja, il-Greċja u l-Portugall jibqgħu l-pajjiżi bl-għola livell ta' qgħad.

Malta, min-naħa l-oħra, żammet il-ħames l-anqas rata ta' qgħad minn fost il-pajjiżi kollha tal-UE, b'rata ta' 6.2%.