Tnaqqis fl-inventarji jtappan iċ-ċifri dwar il-PDG

Il-Prodott Domestiku Gross ta' Malta żdied f'termini ta' flus imma naqas f'termini reali fl-ewwel tliet xhur ta' din is-sena. 

Ċifri dettaljati dwar il-produzzjoni fil-pajjiż bejn Jannar u Marzu juru li fl-ewwel tliet xhur tas-sena kien hemm ħafna oqsma tal-ekonomija li kibru, fosthom l-esportazzjoni u s-servizzi li għandhom x'jaqsmu mal-propjeta' u mat-turiżmu. Żdiedu wkoll il-pagi li daħħlu l-ħaddiema. 

 

Iċ-ċifri ppubblikati mill-Uffiċċju Nazzjonali tal-Istatistika juru li dak li l-pajjiż ipproduċa fl-ewwel kwart tas-sena żdied b'wieħed% meta jitqies fi flus kurrenti – minn 1,541 miljun fl-ewwel tliet xhur tal-2011 għal 1,556 miljun fl-ewwel tliet xhur ta' din is-sena.

Minkejja ż-żieda ta' wieħed% fi flus kurrenti, madankollu, meta wieħed iqis iż-żieda fil-prezzijiet fl-istess żmien, l-Uffiċċju tal-Istatistika jgħid li f'termini reali dak li pproduċa l-pajjiż naqas b'wieħed%.

Miċ-ċifri ddettaljati li ppubblika l-Uffiċċju tal-Istatistika jirriżulta li ħafna oqsma tal-ekonomija kibru. Il-fabbriki żiedu l-esportazzjoni tagħhom barra l-pajjiż. Kien hemm żieda wkoll fl-investiment li n-negozji jagħmlu fil-kapital u fil-makkinarju li jixtru. Il-bejgħ bl-ingrossa u bl-imnut kien wieħed stabbli.

Fost l-oqsma li kibru kien hemm ukoll is-servizzi li għandhom x'jaqsmu mal-propjeta', is-servizzi li jinbigħu minn negozji lil negozji oħrajn, l-edukazzjoni, is-saħħa, il-ħarsien soċjali, u s-servizzi ta' divertiment li jiddependu ħafna fuq it-turiżmu.

X'wassal biex il-produzzjoni tal-pajjiż tidher li naqset kien kalkolu li tradizzjonalment ivarja ħafna bejn perjodu u ieħor. Dan hu l-istima tal-inventarji.

Is-sena l-oħra din l-istima varjat bejn tnaqqis ta' €82 miljun fit-tielet kwart u żieda ta' €32 miljun fl-ewwel kwart. Din is-sena, fl-ewwel kwart, l-istima tal-inventarji kienet li dawn naqsu bi €68 miljun u b'hekk, imqabblin ma' żieda ta' €32 miljun fl-istess perjodu tas-sena ta' qabel, ġabu moviment ta' mitt miljun ewro kontra l-produzzjoni li tagħmel l-ekonomija biex, b'hekk, din tidher li naqset.

Dak li baqa' fi bwiet in-nies mill-andament tal-ekonomija Maltija fl-ewwel tliet xhur tas-sena jidher mill-pagi li daħħlu l-ħaddiema. Iċ-ċifri ddettaljati juru li bejn Jannar u Marzu l-ħaddiema Maltin daħħlu 730 miljun ewro f'pagi, żieda ta' €24 miljun fuq sena qabel, jew f'persentaġġ, żieda ta' 3.3%.