Kenneth XUEREB
27 ta' Lulju, 2010
12:25 CET |
Fiċ-ċentru tal-MCAST fix-Xagħra, Għawdex, b'fondi Ewropej, ftit tax-xhur ilu tlesta l-proġett ta' twaqqif ta' żewġ laboratorji tal-ICT u x-xiri ta' tagħmir għalihom kif ukoll għal laboratorju li kien diġa' jeżisti. Dan il-proġett kien parti minn proġett usa li sar b'investiment ta' madwar nofs miljun ewro għat-tkabbir tal-istitut għall-Informazzjoni u t-Teknoloġija tal-Komunikazzjoni, fejn b'kollox saru 15-il laboratorju f'Malta u tlieta f'Għawdex.
Il-Ministru għal Għawdex Giovanna Debono u s-Segretarju Parlamentari għall-Konsultazzjoni Pubblika Chris Said żaru l-parti tal-proġett fil-kampus tal-MCAST fix-Xagħra, hekk kif kienu qed jintlaqgħu l-applikazzjonijiet minn żgħażagħ Għawdxin li minn Ottubru se jkunu qed jattendu korsijiet offruti mill-MCAST f'Malta jew f'Għawdex.
L-apparat, li nxtara għall-proġett kollu kemm hu jinkludi kważi 380 compjuter, 25 scanner, network switches, projectors, laster printers u anke tliet servers. F'Għawdex tqegħdu 21 computer u apparat ieħor f'kull wieħed mit-tliet laboratorji tal-ICT.
Is-sena li għaddiet 85 student Għawdxi daħlu għal kors tal-ICT f'wieħed minn tliet livelli differenti, bil-faċilitajiet tal-MCAST f'Għawdex issa jifilħu għal 120 student li jkunu qed jagħmlu kors fl-IT fl-istess żmien.
Il-Ministru Giovanna Debono spjegat kif fl-aħħar snin żdiedu l-faċilitajiet u l-opportunitajiet ta' tagħlim għall-istudenti f'Għawdex. B'fondi Ewropej ittejbu l-faċiltiajiet taż-żewġ ċentri tal-MCAST f'Għawdex, fejn anke nbnew workshops għat-tagħlim tal-installazzjoni tal-elettriku u fil-welding u l-fabrikazzjoni fiċ-ċentru tax-Xewkija, u nxatara makkinarju ġdid għall-użu mill-istudenti. Dan wassal biex l-istudenti Għawdxin setgħu jagħmlu l-lezzjonijiet ta' prattika f'Għawdex stess.
Proġetti oħra b'fondi Ewropej saru fiċ-ċentru tal-ITS fil-Qala u fiċ-Ċentru Għawdxi tal-Arti u l-Artiġjanat Wistin Camilleri f'Għajnsielem. Dan minbarra diversi korsijiet, ukoll b'fondi Ewropej, li ngħataw miċ-Ċentru t'Għawdex tal-Universita' ta' Malta.
Is-Segretarju Parlamentari Chris Said qal li dan l-investiment jikkonferma l-impenn tal-Gvern favur l-Edukazzjoni u l-IT, li huma pilastri għall-Viżjoni 2015, u li juża bl-aħjar mod il-fondi Ewropej. Juri wkoll l-impenn tal-Gvern li jkompli jgħin lil Għawdex. Chris Said qal li l-ICT hi responsabbli għat-twaqqif ta' ħafna intrapriżi żgħar u medji u semma kif fl-aħħar sentejn gawdew kważi 400 negozju ta' dan it-tip permezz ta' 25 miljun ewro f'inizjattiva mħaddma mill-Malta Enterprise. 21 negozju minnhom kienu Għawdxin, li bejniethom kisbu 1.6 miljun ewro.
|
