Tindif mill-alka tal-bajja tal-Għadira

Temp sabiħ jgħidlek oħroġ 'il barra.  U rridu nammettu...aħna l-Maltin minkejja li mdorrijin b'temp sabiħ is-sena kollha, f'dan iż-żmien inkunu qed nistennew ix-xemx terġa' toħroġ u tiddomina s-sema blu. Fil-fatt, hemm min diga' jkun beda' jippjana l-ewwel għawma tiegħu.

U biex kemm il-Maltin kif ukoll il-barranin isibu l-isbaħ ambjent fil-bajjiet Maltin, id-Direttorat tat-Tindif għaddej b'ħidma kontinwa biex l-alka li tkun telgħet fix-xhur tax-xitwa titnaddaf.

Morna l-Għadira fejn bħalissa qed isir dan ix-xogħol. L-ammont ta' alka li tela' fil-bajjiet din is-sena hu wieħed kbir.

Dan ix-xogħol jibda fil-bidu t'April biex sa Mejju, l-aktar Ġunju, l-bajjiet ikunu mnaddfin kollha – lesti biex jilqgħu eluf ta' Maltin u turisti fix-xhur tas-sajf. 

Parti mill-bajja tal-Għadira diġa' ġiet imnaddfa u l-alka ġiet imneħħija. Fil-fatt, mill-Għadira biss diġa' tneħħew madwar 1,200 tunnellata fil-ftit jiem li ilu għaddej ix-xogħol.

B'kollox, s'issa, fi spazju ta' ftit ġimgħat, tneħħew aktar minn 3,000 tunnellata mill-bajjiet Maltin fosthom mitejn mill-bajja ta' San Tumas. 

Interessanti xi jsir mill-alka ladarba din titneħħa mill-bajjiet. Normalment, din tiġi depożitata fil-landfill tal-Magħtab, iżda dan l-aħħar, l-alka saret ukoll riżors importanti għall-bdiewa.

Dan il-proċess li rajna, jibda lejn l-aħħar ta' Marzu u l-bidu t'April għal raguni partikolari. Dan peress li fix-xhur tax-xitwa, l-alka tiproteġi r-ramel u żżommu milli jmur gol-baħar u b'hekk, il-bajjiet Maltin u Għawdxin - li huma waħda mir-raġunijiet li jattiraw lejn Malta ħafna turisti – jiġu kkonservati u jinżammu fl-aqwa stat li jixirqilhom.