Sussidji għax-xiri tal-proprjeta'

Permezz ta' skema mill-Awtorita' tad-Djar 115-il appartament, 8 maisonettes u 98 garaxx se jkunu issusidjati biex jinbiegħu ħafna irħas mill-prezz kummerċjali tagħhom biex b'hekk tkun aktar faċli għal koppji u kull min irid jixtri dar, biex ikunu sidien tal-proprjeta` tagħhom.

Dan qalu il-Ministru tal-Ġustizzja, id-Djalogu u l-Familja, Chris Said, waqt konferenza tal-aħbarijiet li fiha tkellmu ukoll diversi uffiċjali tal-Awtorita` tad-Djar.

Chris Said qal li permezz ta' din l-iskema, min jakkwista proprjeta` mill-Awtorita tad-Djar u jħallas 15% f'depozitu mal-Konvenju se jiffranka 25% mill-prezz kummercjali. Barra minn hekk se jiffranka madwar 20 elf ewro f'imgħaxijiet li kieku jkollu jħallas  lil banek.

L-appartamenti offruti f'din l-iskema huma mifruxin  ma' diversi lokalitajiet f'Malta. Biex wieħed japplika jrid ikun għalaq 18-il sena u jibda jgħix fl-appartament li jkun xtara fi zmien sentejn.

Min igawdi minn din l-iskema ma jkunx jista jbiegħ l-appartament qabel ma jgħaddu 5 snin mill-akkwist, waqt li jkun jista' jbiegħa, mingħajr ma jħallas is-sussidju li jkun ingħata mill-Gvern, wara 10 snin.

Kull min jakkwista proprjeta` taħt din l-iskema għandu l-obbligu li jinstalla solar water panels fejn hu possibli.

L-applikazzjonijiet għal min irid igawdi minn din l-iskema se jibdew jingabru mit-12 sat-23 ta' Mejju, waqt li l-pubbliku se jkun jista' jara 'l dawn l-appartamenti mit-12 sal-20 ta' Mejju.  

Il-Ministru Said qal li l-Awtorita tad-Djar introduċiet xejn inqas minn 17-il skema. Fost dawn hu semma l-iskema tal-Kiri li fiha l-Awtorita kriet mijiet ta' appartamenti mill-privat biex tkun tista toffrihom għall-kiri lill-pubbliku bi prezz issussidjat.