Kenneth XUEREB
22 ta' Mejju, 2012
11:10 CET |
It-tfajliet tar-raba' sena li jattendu l-iskola sekondarja taż-Żejtun li tagħmel parti mill-Kulleġġ Santa Margerita kellhom ħarġa edukattiva mhux ta' soltu hekk kif iddawru mal-Berġa ta' Kastilja u l-gwida tagħhom kien il-Prim Ministru Lawrence Gonzi innifsu.
Il-Prim Ministru laqa' lill-istudenti fl-entratura prinċipali tal-bini li jospita l-uffiċċju tiegħu. L-istudenti setgħu jaraw is-sala tal-Ambaxxaturi fejn isiru laqgħat ma' kapijiet ta' stat u gvern li jżuru pajjiżna.
Wara l-istudenti żaru wkoll is-sala tal-kabinett fejn Lawrence Gonzi spjega fuq, fuq x'jiġri waqt laqgħa tal-kabinett tal-ministri u l-preparazzjoni li ssir għaliha kif ukoll l-ufficcju tal-istess Prim Ministru.
Din tas-sekondarja tal-bniet tal-Kulleġġ Santa Margerita fiż-Żejtun kienet l-aħħar waħda għal din is-sena skolastika minn sensiela ta' żjarat minn skejjel tal-istat, tal-Knisja u indipendenti fil-Berġa ta' Kastilja – bil-kollaborazzjoni tal-Ministeru tal-Edukazzjoni – bħala parti mill-kurrikulu tal-Istudji Soċjali.
Iktar minn 1,300 student u studenta żaru l-Berġa ta' Kastilja matul din is-sena skolastika.
|
sezzjoni: aħbarijiet lokali
Ċentri tas-saħħa
