Statistika dwar il-kunsilliera eletti

Fl-elezzjonijiet tas-Sibt li għadda, li għall-ewwel darba saru f'nofs Malta f'daqqa, ġew eletti b'kollox 239 kunsillier, li jfisser 10 aktar milli ġew eletti meta l-aħħar li saru l-elezzjonijiet fl-istess lokalitajiet.  

Dan minħabba li f'sitt kunsilli żdiedu bi tnejn is-siġġijiet kaġun ta' żieda fil-popolazzjoni, waqt li f'kunsill wieħed, il-popolazzjoni ċkienet, allura l-kunsill naqsulu żewġ siġġijiet.

Il-PN tella' total ta' 105 kunsillieri, waqt li l-PL tella' 131 kunsillier.  L-AD tellgħet tnejn, waqt li kunsillier ieħor ġie elett f'isem partit ieħor, fil-Furjana.

Meta wieħed iqabbel mat-totali tal-aħħar rawnd ta' elezzjonijiet fl-istess lokalitajiet, dan ifisser li l-PN naqqas ħames siġġijiet, waqt li l-PL żied ħmistax. L-AD baqgħet fejn kienet, b'żewġ kunsillieri, u l-uniku kunsillier indipendenti elett din id-darba hu l-istess wieħed tal-aħħar darba, fil-Furjana.

Il-PN naqqas kunsillier f'Ħaż-Żebbuġ, Birżebbuġa, Had-Dingli, il-Ħamrun għax ċkien il-kunsill, Hal Kirkop, il-Marsa, tas-Sliema, il-Qala fejn tilef il-maġġoranza, Ħal Safi fejn ukoll tilef il-maġġoranza, u l-istess f'San Pawl li mhux biss għadda f'idejn il-Lejber imma anke kiber bħala kunsill. Imma żied kunsillier fil-Mosta li rebaħħa lura, fix-Xagħra fejn il-kunsill kiber u f'Ħ'Attard li wkoll kbier, u l-PN żied żewġ kunsillieri fis-Swieqi fejn ukoll il-kunsill kiber.

Min-naħa tiegħu l-PL rebaħ siġġu wieħed f'kull wieħed minn dawn il-kunsilli: Ħaż-Żebbuġ, Ħ'Attard, Birżebbuġa, Ħad-Dingli, Hal Kirkop, il-Marsa, iż-żewġ lokalitajiet tal-Qala u Ħal Safi fejn rebaħ il-kunsill, is-Swieqi u x-Xagħra, f'dawn l-aħħar żewġ każi, bħal fil-każ tal-PN minħabba żieda fin-numru ta' kunsillieri li jiffurmaw il-kunsill.  Waqt li żied żewġ siġġijiet fiż-Żurrieq u San Ġiljan fejn fiż-żewġ każi wkoll il-kunsill kiber, u tlieta f'San Pawl parzjalment ukoll minħabba żieda fis-siġġijiet f'dan il-kunsill li għadda f'idejn il-PL.

Min-naħa l-oħra l-Lejber tilef siġġu fil-Ħamrun, hawnhekk ukoll bhall-PN minħabba tnaqqis fin-numru ta' siġġijiet li jiffurmaw il-kunsill, u tilef siġġu fil-Mosta li għaddiet f'idejn il-PN.

Min-naħa tagħha l-AD tilef is-siġġu li kellha fis-Swieqi imma rebħet siġġu ġdid f'tas-Sliema. Żammet dak li kellha f'Ħ'Attard.

Wara dawn l-elezzjonijiet, minn total ta' 35 lokalita' l-PN issa għandu maġġoranza fi ħmistax, il-Partit Laburista jmexxi 19 waqt li ħadd m'għandu maġġoranza ta' kunsillieri f'kunsill wieħed.

Li jfisser li bħala bilanċ il-PN naqqas żewġ maġġoranzi u l-PL żied tnejn.  

Fil-verita', il-PN tilef tliet maġġoranzi u rebaħ waħda, waqt li l-PL tilef maġġoranza waħda u rebaħ tlieta.

Il-lokalitajiet li biddlu l-idejn huma l-Mosta li mingħand il-PL marret għand il-PN, u San Pawl il-Baħar, Ħal Safi u l-Qala Għawdex li mingħand il-PN marru għand il-PL.