Seminar bit-tema 'Messageri d'Isole: Malta e Sicilia'

Il-Ministeru tal-Affarijiet Barranin flimkien mal-konslu ta' Malta għal Sqallija, Chiara Cali', matul il-jum tas-Sibt , organizzaw seminar bit-tema Messaggeri di Isole: Malta e Sicilia. L-għan ta'dan is-seminar kien li jkun diskuss ix-xebħ bejn Malta u Sqallija.

Fost is-suġġetti li ġew diskussi kien hemm l-kultura, l-lingwa, t-tradizzjonijiet u l-ilbies fost oħrajn.

Preżenti għal dan is-seminar kien hemm wkoll il-Ministru għall-Affarijiet Barranin Tonio Borg fejn fid-diskors tiegħu sostna kif iż-żewġ gżejjer kif ukoll l-Italja għandhom storja u kultura komuni li fl-istess ħin huma ta' prestiġju kbir.

Tonio Borg semma l-fatt kif sal-1935 pajjiżna kien għad għandu l-lingwa Taljana bħala l-lingwa uffiċjali tiegħu li ħalliet l-influwenza tagħha fuq il-lingwa Maltija li għadha tinħass sa llum il-ġurnata.

Hu qal li ż-żewġ pajjiżi ma għandhomx jinsew li huma parti mill-Mediterran u allura ma għadhomx iwarrbu l-politika mediterranea li tgħaqqad liż-żewġ popli mal-pajjiżi Għarab speċjalment dawk tal-Afrika ta' Fuq  bħal l-Libja - pajjiżi li kapaċi jagħtu kontribut pożittiv fl-ekonomija Maltija u dik Taljana.