Marlene Bonnici r-Rappreżentant Permanenti ta' Malta għall-Unjoni Ewropea

Il-Kabinett approva l-ħatra ta' Marlene Bonnici bħala Rappreżentant Permanenti ta' Malta għall-Unjoni Ewropea wara r-riżenja ta' Richard Cachia Caruana.

Marlene Bonnici, membru tas-Servizz Diplomatiku, issieħbet fis-Servizz Pubbliku bħala għalliema fl-1989, wara li temmet l-istudji tagħha fl-Università ta' Malta fejn akkwistat first class degree. Hi studjat il-politika internazzjonali, il-kummerċ u finanzi internazzjonali, il-liġi internazzjonali u studji diplomatiċi ġewwa l-Università ta' Oxford. Fl-1992 ingħaqdet fis-Servizz Diplomatiku Malti u serviet bħala first secretary fl-Ambaxxata Maltija ġewwa Bonn fil-Germanja u fl-Ambaxxata Maltija fi Brussel.

Marlene Bonnici ħadmet fid-Direttorat tal-Unjoni Ewropea fil-Ministeru tal-Affarijiet Barranin, fejn kienet responsabbli primarjament għall-koordinazzjoni tal-pożizzjoni Maltija dwar għadd ta' kapitli tal-acquis communitaire, kif ukoll l-istrumenti u inizjattivi ta' finanzjament ta' qabel is-sħubija ta' Malta fl-Unjoni Ewropea. Hi nħatret wkoll bħala Segretarju Permanenti fl-Uffiċċju tal-Prim Ministru b'responsabbiltà ġenerali tal-Fondi tal-Unjoni Ewropea f'Malta.

Il-Prim Ministru Lawrence Gonzi feraħ lil Marlene Bonnici għall-ħatra tagħha, filwaqt li rringrazzja lil Cachia Caruana għall-ħidma kbira li wettaq għall-ġid ta' pajjiżna, huwa awgura kull suċċess lir-Rappreżentant Permanenti ġdida.

Richard Cachia Caruana minn naħa tiegħu wkoll feraħ lil Marlene Bonnici, filwaqt li rringrazzja lill-istaff tar-Rappreżentanza Permanenti ta' Malta għall-Unjoni Ewropea u awgura li taħt id-direzzjoni l-ġdida ikomplu jaħdmu fl-aħjar interess ta' Malta.