L-ewwel fażi tal-proġett tal-Magħtab mistennija titlesta f'Ottubru

L-ewwel fażi tal-proġett ta' rijabilitazzjoni tal-miżbla tal-Magħtab li tkopri biċċa art ta' 60,000 metru kwardu se titlesta sa Ottubru ta' din is-sena u diġa' sar investiment ta' €9 miljun li 85% huma fondi tal-Unjoni Ewropea.

Dan tħabbar waqt żjara li l-Prim Ministru Lawrenċe Gonzi għamel f'dan is-sit biex jara l-progress li sar fir-rijabilitazzjoni tal-miżbla. Hu kien akkumpanjat mill-Ministru għar-Riżorsi u l-Affarijiet Rurali, George Pullicino, minn Ben Farrugia, iċ-Chairman ta' WasteServ u uffiċjali oħra.

L-ewwel fażi kienet tinkludi xogħol biex il-ħafna saffi tal-miżbla jkunu msaħħa u ma jikkrollawx kif ukoll tħaffru madwar 400 bir biex jittellgħu il-gassijiet. 80% ta' dawn il-gassijiet huma ħżiena u qed jinħarqu filwaqt li l-20% l-oħra qed jintużaw biex jitħaddem il-form li jaħraq il-gassijiet.

Bħalissa qed jinbnew ammont ta' ħitan b'tul ta' 11-il kilometru biex iżommu s-saffi tal-miżbla li tgħattew u fuqhom se jitpoġġa saff ħamrija. Żewġ kilomteri minnhom huma hitan tas-sejjieħ.

It-tieni fażi ta' dan il-proġett tinkludi t-tħawwil ta' siġar u arbuxelli u tisbiħ ambjentali biex din li hi meqjusa li kienet l-akbar ġerħa ambjentali f'pajjiżna tinbidel f'park ta' rikreazzjoni għal familja b'investiment totali ta' kważi €30 miljun. It-tieni fażi tkopri biċċa art ta' 260,000 metru kwadru.

Il-Prim Ministru qal li dan il-proġett, flimkien ma' proġetti oħra kapitali, qed joħloq ix-xogħol għall-ħaddiema.

Ben Farrugia qal li l-miżbla tal-Magħtab bdiet fis-snin '70 u sa meta ingħalqet fl-2004 kienu intefgħu fiha madwar 22.5 miljun tunnellata skart. Hu spjega x-xogħol ta' rijabilitazzjoni li sar s'issa u x-xogħol li għad irid isir biex il-miżbla tinbidel f'park għall-familja li mistenni jitlesta fis-sena 2014.