L-MLP jibqa’ bil-politika ta’ indħil u partiġjana

Fl-aħħar jiem il-Malta Labour Party għamel pressjoni kbira sabiex tiċċaqlaq attività li għandha ssir nhar is-Sibt f'Ħal Qormi, sempliċiment għaliex din l-attività se taħbat fl-istess ġurnata tal-mass meeting li se jkun qed jorganizza l-Labour f'Ta' Qali.

Diversi persuni li tkellmu ma' dan is-sit stqarrew ir-rabja tagħhom għall-mod kif aġixxew uffiċjali għolja tal-MLP u anke għall-mod partiġġjan kif imxiet s-Sindku Laburista ta' Ħal Qormi. 

Is-Sindku Laburista Rosianne Cutajar – persuna imbuttata ’l quddiem minn Joseph Muscat – telgħet għall-ewwel darba fil-Kunsill bl-għajta li se tkun qed tisma' lin-nies. Meta fil-fatt, qalulna diversi sorsi, lanqas fuq xi ħaġa sempliċi bħalma hi attività kulturali ma kienet kapaċi timxi mingħajr partiġjaniżmu u ġabet l-interess tal-MLP qabel l-interessi tar-residenti Qriema.

Dan il-ġurnal hu nfurmat li l-ġimgħa l-oħra, l-organizzatur tal-attività ‘Lejl f'Casal Fornaro’, issejħu fil-każin tal-Labour f’Ħal Qormi biex issir pressjoni ħalli tinstab data alternattiva għal dan l-avveniment kulturali u jkun pospost. 

Nies li tkellmu magħna qalulna li dan sar għaliex “beżgħu li ma jmorrux nies għall-mass meeting”.

Barra minn dan, l-istess persuni qalulna li f'din il-laqgħa, is-Sindku Rosianne Cutajar heddedt li twaqqaf xi fondi u jkun hemm “bojkot”, filwaqt li sar ukoll theddid fuq xi kumpaniji li hemm involuti fl-organizzazzjoni ta' dan il-festival.

Dan is-sit għandu tagħrif li l-organizzaturi saħansitra rċivew telefonati minn uffiċjal miċ-Ċentru Nazzjonali Laburista.

L-indħil tan-nies ta' Muscat f'din l-attività urta lil bosta Laburisti ġenwini li għadhom ma jistgħux jifhmu għaliex sar dan it-theddid fuq żgħażagħ li jaħdmu bi sħiħ tul is-sena kollha b'mod volontarju sabiex jesponu t-talent Qormi.

Fl-elezzjoni ta' Marzu li għadda s-Sindku Laburista Rosianne Cutajar ġabet 1,445 vot, u bis-saħħa tal-imbuttatura ta' Muscat irnexxiela taqla mit-tmexxija tal-Kunsill lill-eks Sindku Jesmond Aquilina.