David BONELLO
30 ta' Lulju, 2010
20:31 CET |
L-2010, li hija sena ddedikata mill-UE għall-ġlieda kontra l-faqar u l-esklużjoni soċjali, titlob kuxjenza akbar dwar id-drittijiet tal-anzjani u l-vittmi tal-vjolenza domestika.
Dan ħareġ waqt seminar b'rabta ma' din is-sena Ewropea indirizzat fost l-oħrajn mis-Segretarju Parlamentari għall-Anzjani u l-Kura fil-Komunita' Mario Galea li saħaq li s-soċjeta' għandha tibża' għall-anzjani tagħna.
Mario Galea saħaq li l-anzjani fil-komunita', li dejjem qed jiżdiedu, jagħtu konribut kbir fil-qasam tal-volontarjat fis-soċjeta' tagħna tant li ħafna mil-għaqdiet fil-komunita' u fl-irħula tagħna huma mmexxijin mill-anzjani, jew hemm l-anzjani jagħtu kontribut kbir fihom.
Is-Segretarju Parlamentari Mario Galea qal li f'eżerċizzju li sar mis-segretarjat tiegħu il-parroċċi f'Malta u Għawdex ikkonfermaw li ħafna minn dawk li jagħtu kontrbut fil-paroċċi huma anzjani li irtiraw u għandhom ħafna ħin f'idejhom.
Mario Galea qal li l-ammont ta' anzjani fis-soċjeta' dejjem qed jiżdied tant li sal-2050 f'Malta se jkun hawn 'il fuq minn 150 elf persuna li jkollhom aktar minn 65 sena. B'hekk saħaq fuq l-importanza li s-soċjeta' għanda dejjem aktar tħares l-anzjani.
L-iskop ta' dan is-seminar, li kien it-tielet wieħed tat-tip tiegħu, kien biex isir appell ħalli titqajjem kuxjenza u rispett lejn l-anzjani u biex tinħoloq kuxjenza fuq id-drittijiet tal-persuni li qegħdin jesperjenzaw vjolenza domestika.
Fost il-kelliema ta' dan is-seminar kien hemm Rose Sammut, Ambaxxatriċi għas-Sena Ewropea u Segretarja tal-Kummissjoni Nazzjonali għall-Persuni Anzjani, Marceline Naudi, Ambaxxatriċi għas-Sena Ewropea u Chairperson, Kummissjoni fuq il-Vjolenza Domestika, Stephanie Xuereb, Direttur tal-Anzjani u s-Servizzi fil-Komunita' fil-Ministeru tas-Saħħa, l-Anzjani u l-Kura fil-Komunita', u Maryanne Gauci, Maniġer tal-Adulti u s-Servizzi fil-Familja fl-Aġenzija Appoġġ.
|
