Konferenza Annwali tal-Inġiniera

L-ilma hu essenzjali mhux biss għall-ekonomija, iżda wkoll għall-għajxien u l-ħajja ta' kuljum, Hu għalhekk li l-Gvern dejjem kien fuq quddiem biex jiġi protett u kkonservat l-ilma f'Malta.

Dan qalu l-Ministru tat-Turiżmu, l-Ambjent u l-Kultura, Mario de Marco, waqt il-21 Konferenza Annwali tal-Inġiniera li fiha ġiet diskussa l-isfida tal-Ilma għas-Seklu 21. Fil-Konferenza ħadu sehem ukoll fost l-oħrajn il-President tal-Kamra tal-Inġiniera, Saviour Baldacchino u l-Kap Eżekuttiv tal-Korporazzjoni għas-servizzi tal-Ilma Marc Muscat.

Il-Ministru de Marco fakkar fil-miljuni li investa l-Gvern biex id-drenaġġ kollu jiġi trattat qabel jilħaq jinżel fil-baħar.

Fil-fatt Malta ġiet iċċertifikata fost l-aqwa fl-Ewropa fil-kwalita` tal-ilma li għandha. Barra minn hekk Malta hi l-unika pajjiż fil-Mediterran li titratta d-drenaġġ kollu qabel jinżel fil-baħar.

Mario de Marco qal li permezz tal-iskemi li l-Gvern diġa għamel u li se jintroduċi, speċjalment permezz tal-Pjan Strateġiku fuq l-Ambjent għas-snin li ġejjin, l-ilma f'Malta se jkun ikkonservat bl-aħjar mod possibli.

Hu faħħar lil-Lukandi Maltin li 15% minnhom irċivew ċertifikazzjoni tajba fil-prattiċi tas-sostenibbilta tal-ilma

Madanakollu xorta jibqgħu jeżistu l-isfidi, hekk kif skont stħarriġ tal-Assoċjazzjoni tal-Lukandi u r-ristoranti għad fadal ħafna negozji li ma ħadux miżuri biex jiġi użat u kkonservat aħjar l-ilma.

Il-Ministru qal li l-isfida tal-ilma għal Malta hi akbar minħabba ir-riżorsi minimi li għandha u anke minħabba l-popolazzjoni li dejjem qed tikber.

Min-naħa tiegħu Savior Baldacchino ukoll enfasizza fuq l-importanza li kull negozju jikkunsidra strateġija tajba għas-sostenibbilta tal-ilma u faħħar lill-Inġiniera tax-xogħol li jagħmlu f'dan il-qasam.

.