Jikber il-misteru ta’ Emanuela Orlandi

Wara li nhar it-Tnejn il-Pulizija Forensika fetħet il-kripta f’bażilika f’Ruma biex joħorġu l-katavru ta’ kriminal magħruf  bħala parti minn investigazzjoni fl-għajbien fl-1983 ta’ Emanuela Orlandi, bint impjegat tal-Vatikan, il-misteru jidher li se jkompli għalissa.

Fil-qabar suppost hemm il-katavru ta’ Enrico De Pedis, mexxej ta’ grupp kriminali, La Magliana, li kien werwer il-kaptiali Taljana fis-snin Sebgħin u Tmenin. Il-qabar infetaħ għax kien hemm ħafna allegazzjonijiet li jekk jinfetaħ kien se jitwaddab dawl fuq il-każ ta’ Orlandi.

 

Fil-qabar, apparti l-fdalijiet ta’ dak li hu maħsub huma ta’ De Pedis, instabu wkoll għadam oħra. Issa dawn se jibdew ikunu eżaminati biex ikun stabbilit jekk dak li kien hemm midfun hux De Pedis kif ukoll jekk hemmx fdalijiet ta’ Orlandi. Orlandi kellha 15-il sena meta għebet wara li ħarġet mill-appartament tal-familja fil-Vatikan biex tmur għal lezzjoni tal-mużika. De Pedis kien inqatel fl-1990. Eks maħbuba tiegħu kienet sostniet li kien De Pedis li kien ħataf lil Orlandi u mbagħad fl-2005, waqt programm investigativ Taljan, persuna ċemplet u qalet li t-tweġiba għall-għajbien kienet fil-qabar ta’ De Pedis.

 

Ir-Reverendu Frederico Lombardi, kelliem tal-Vatikan, qal li l-ftuħ tal-qabar kien pass pożittiv bl-iskop li jittieħdu l-passi kollha possibbli biex il-każ jiġi solvut. De Pedis kien midfun fil-Bażilika ta’ Sant’Apollinare u dan qanqal ħafna mistoqsijiet kif wieħed mill-aktar kriminali magħrufa u brutali fl-Italja jispiċċa midfun hemm.

 

Avukat għall-familja De Pedis qal li l-investigaturi sabu madwar 200 kontenitur b’għadam qrib il-qabar tiegħu u fil-ġimgħat li ġejjin dawn se jkunu eżaminati biex jaraw jekk fosthom hemmx ta’ Orlandi. Pietro Orlandi, ħu Emanuela, li kien preżenti t-Tnejn, qal li l-katavru kien relattivament f’kundizzjoni tajba imma fil-qabar kien hemm biss katavru wieħed, ta’ raġel. 

 

Il-każ ta’ Orlandi hu wieħed mill-akbar misteri tal-istorja riċenti Taljana u kien marbut saħanstira mal-attentat fuq il-Papa Ġwanni Pawlu II li seħħ sentejn qabel kif ukoll mal-Arċisqof  Amerikan Paul Marcinkus li kien imexxi il-bank tal-Vatikan u kien involut fi skandlu finanzjarju kbir.