It-tenur Joseph Calleja f'kunċert ieħor fuq il-Fosos

It-tenur Malti Joseph Calleja se jagħti l-kunċert ieħor fis-7 ta’ Lulju, fuq il-Fosos tal-Furjana. Dis-sena, f’dan il-kunċert annwali tas-sajf se jingħaqdu miegħu fuq il-palk il-kantanti Ronan Keating u Gigi D’Alessio. 

Id-dettalji ta’ dan l-avveniment tħabbru minn NnG Promotions u mit-tenur Joseph Calleja waqt konferenza tal-aħbarijiet li saret f’Palazzo Parisio, u li kienet indirizzata wkoll mill-Ministru tat-Turiżmu, il-Kultura u l-Ambjent, Mario de Marco, il-Kap Eżekuttiv ta’ HSBC Bank Malta Mark Watkinson u Balesh Sharma, Kap Eżekuttiv ta’ Vodafone Malta.

Il-kunċert annwali tas-sajf tat-tenur Malti issa sar avveniment stabbilit fil-kalendarju tal-attivitajiet kulturali ta’ pajjiżna. L-isforzi ta’ Calleja għenu biex il-mużika klassika tkun aktar aċċessibbli mill-pubbliku ġenerali u l-kunċert ta’ din is-sena wkoll mistenni jiġbed lejh eluf ta’ dilettanti tal-mużika li jkunu qed jistennew biex għal darb’oħra jkollhom din l-esperjenza.

Il-Ministru tat-Turiżmu Mario de Marco qal li l-Kunċert tas-Sajf ta’ Joseph Calleja sar appuntament annwali li jħobbu ħafna Maltin u barranin. Kompla jgħid li dan hu avveniment li jsaħħaħ il-kalendarju kulturali taghna. Mario de Marco qal ukoll li n-numru ġmielu ta’ kisbiet li għamel Joseph barra minn Malta u l-fama internazzjonali li għandu fi ħdan iċ-ċrieki tal-mużika klassika jagħmluh wieħed mill-akbar ambaxxaturi kulturali ta’ pajjiżna. 

Joseph Calleja għadu kemm ġej minn staġun tajjeb ħafna li matulu dar l-aktar teatri importanti tad-dinja.