16 ta' Marzu, 2012
16:20 CET |
Dun Ġorġ Preca kien beda bil-passi tiegħu lejn il-qdusija propju b'każ li kien qed ikun segwit minn Ċensu Tabone bħala tabib li kien speċjalizzat fil-kura tal-għajnejn.
Kien Cħarles Zammit Endrich, il-pazjent li kien qed ibati minn tiċrit fir-retina, il-parti tal-għajn li biha tara d-daw. Il-każ kien diffiċli biex jitfejjaq imma ġara li bl-interċessjoni ta' Dun Ġorġ Preca il-problema għebet.
Maltarightnow.com iltaqa' ma Kenneth Zammit Endrich, bin Charles, li rrakkontalna kif jiftakar lill-President Emeritu Ċensu Tabone.
Hu qalilna li Ċensu Tabone kien opera lill-missieru u wara xahrejn li kienet saret din l-operazzjoni il-problema reġgħet feġġet. Meta kien reġa' feġġ il-każ it-tabib Tabone kien tal-opinjoni li ftit li xejn kien hemm ċans li l-għajn tkun salvata.
Iżda ġara li xi nies devoti lejn San Ġorġ Preca kienu ħadu biċċa lazz miż-żarbun ta' dan is-saċerdot lil Charles Zammit Endrich u minn dak il-ħin ħassu jmur għall-aħjar. Saħansitra meta neħħa l-faxex minn ma' għajnejh irriżulta li dan kien beda jara ċar.
Malli t-Tabib Ċensu Tabone mar jinvistah, bħalma kien jagħmel ta' kuljum, induna li kienet ġrat xi ħaġa mhux tas-soltu - kien induna li l-pazjent kien fieq b'mod inspjegabbli. Wara dan it-tabib Tabone kien intalab jagħti x-xhieda tiegħu ta' dak li kien seħħ f'dan il-każ, meqjus miraklu.
Kenneth Zammit Endrich jiftakar ukoll iż-żmien li hu stess kien għamel jaħdem mal-President Ċensu Tabone.
Dan kien każ ieħor minn ħafna li ltqajna magħhom u li fihom tispikka l-umanita' ta' dan il-bniedem, li kien kapaċi jisma' u jħobb, iżda fuq kollox kien bniedem ta' fidi kbira.
|
sezzjoni: aħbarijiet lokali
Ċentri tas-saħħa
