Is-sitt edizzjoni ta' Lejlet Lapsi

Attivitajiet kulturali u għat-tfal, divertiment, kunċerti, u festa ta' ikel tradizzjonali se jkunu l-qofol ta' Lejlet Lapsi Notte Gozitana li se jsir fi tmiem din il-ġimgħa fil-qalba tar-Rabat Għawdex.

Sabiex aktar Maltin ikunu attirati lejn din is-sitt edizzjoni ta' Lejlet Lapsi, Notte Gozitana, il-kumpanija Gozo Channel se tkun qed toffri trasport bla ħlas lil dawk il-persuni li jaqsmu mingħajr karozza minn Għawdex għal Malta bejn nofsillejl tas-Sibt u nofsillejl tal-Ħadd.

Is-servizz tal-kumpanija Arriva ukoll se jopera servizzi speċjali lejn kull raħal u lejn il-port tal-Imġarr f'nofsillejl tal-Ġimgħa, u wkoll kmieni l-Ħadd b'servizzi fin-nofsiegħa u s-sagħtejn ta' filgħodu.

Il-programm t'attivitajiet jiġi fi tmiemu permezz ta' rappreżentazzjoni ta' musical ibbażat fuq il-kitba tal-poetessa Għawdxija Mary Meilaq, fi Ġnien Villa Rundle.

L-attivitajiet ta' din is-sitt edizzjoni se jsiru fil-pjazez prinċipali tar-Rabat, iċ-Ċittadella u anke t-toroq dojoq li joffru l-karattru tipiku tradizzjonali.