Ippremjati tfal li attendew sessjonijiet ta' 'New Leaf Storytelling'

Għal dawn l-aħħar tmien ġimgħat, fil-Librerija Pubblika Ċentrali fil-Furjana kienu organizzati sessjonijiet ta' 'story telling' għal-tfal sa  seba' snin.  

Dawn it-tfal kienu qed jiġu akkumpanjati mill-ġenituri tagħhom u s-sessjonijiet saru bil-kollaborazzjoni ta' tmien voluntieri membri fin-New Leaf, li hija NGO flimkien mal-Librerija Pubblika Ċentrali u l-Kunsill Nazzjonali tal-Ktieb.  

Qabel ma waqfu għall-vaganzi tas-sajf, ġiet organizzata attivita' li fiha dawn it-tfal ġew ippremjati b'kotba biex ikomplu jrawmu fihom l-imhabba għall-qari. Dawn it-tfal,  ġimgħa wara ġimgħa attendew bi ħġarhom għal dawn is-sessjonijiet ta' qari, tpinġija, kant u żfin. Kull ġimgħa l-organizzaturi kienu jistiednu mistieden jew mistiedna speċjali sabiex jaqsmu mat-tfal it-talenti tagħhom.  Għall-attivita' tal-:imgħa wara nofsinhar kienet mistiedna Emma Cutajar, tifla ta' 5 snin li kantat diversi kanzunetti. Il-premjazzjoni saret mill-Ministru Dolores Cristina li qasmet il-kotba lil kull tifel u tifla u kellha l-opportunita' li titkellem mat-tfal preżenti. 

Is-sessjonijiet ta' 'story telling' kienu jsiru kull nhar ta' ġimgħa – ġimgħa jsir qari bl-Ingliż u ġimgħa oħra qari bil-Malti. Għal kull sessjoni kienu jattendu madwar tletin tifel u tifla. Is-sessjonijiet ġew organizzati minghajr hlas. Il-hsieb hu li dawn is-sessjonijiet jerġgħu jibdew wara s-sajf u hu ppjanat ukoll li jiżdiedu l-lokalitajiet fejn jiġu organizzati kif ukoll li dawn ikunu miftuħa għal firxa aktar wiesgħa ta' etajiet.