Investiment fl-ulied: il-ġejjieni tal-pajjiż

Fid-djalogu tal-Partit Nazzjonalista, kienu bosta dawk li għamlu l-interventi tagħhom, tkellmu dwar il-ħidma tal-Gvern kif ukoll taw is-suġġerimenti tagħhom lill-Prim Ministru ta' kif il-Partit Nazzjonalista jista' jkompli jaħdem għall-ġid tal-familji Maltin u Għawdxin.

Il-Professur Ray Mangion, li hu lekċerer, qal li Malta għandha storja mill-isbaħ, fost l-aqwa fl-Ewropa. Hu ssuġġerixxa lill-Prim Ministru biex jinbena arkivju nazzjonali li jiġbor l-arkivji kollha ta' pajjiżna. 

Luana Vassallo, studenta fl-Applied Biomedical Sciences, spjegat kif fl-aħħar erba' snin, l-istudenti f'dan il-kors fl-Universita' aktar milli ttriplaw. Hi qalet li hi u sħabha qed ikollhom l-opportunita' li jkomplu jistudjaw f'dan il-qasam, anke grazzi għall-makkinarju fl-Isptar Mater Dei. Hi rringrazzjat il-Prim Ministru għax permezz tal-BioMaltaCampus u l-Isptar tal-Kura tal-Kanċer, hi għandha xogħol garantit.

Mark Anthony Sammut hu inġinier u fl-aħħar sentejn, gawda minn borża ta' studju tal-Gvern biex studja fil-livell ta' Masters fit-telekomunikazzjoni. Hu rringrazzja lill-Gvern talli dejjem iggarantixxa l-opportunitajiet liż-żgħażagħ f'setturi differenti. Hu qal li trid issir aktar enfasi biex l-edukazzjoni twassal liż-żgħażagħ jaħsbu, jikkritikaw u jirraġunaw aktar. Dan għaliex l-edukazzjoni hija ċ-ċavetta tal-progress, qal Mark Anthony Sammut.

Intervjenew ukoll żewġ studenti tal-Higħer Secondary. Neil Smart irringrazzja l-Prim Ministru għall-istipendji u għall-fatt li biex wieħed ikompli jistudja, għandu bżonn biss il-ħiliet tiegħu. Hu appella biex il-korsijiet anqas popolari mal-istudenti jingħataw importanza wkoll.

Min-naħa tiegħu, Jean Claude Vella, li jistudja l-Maths u l-Physics, appella wkoll biex numru ta' korsijiet li ma tantx huma popolari, jiġu spjegati aktar lill-istudenti. Qal ukoll li l-investiment li sar fil-Higħer Secondary fin-Naxxar qed iħalli l-frott, għax din l-iskola llum għandha reputazzjoni tajba.

Tkellem ukoll Gaetano Cristina, pensjonant li għażel li jibqa' jaħdem. Hu qal li x-xogħol żammu f'saħħtu, u għalhekk, irringrazzja l-Gvern tal-inċentiv li filwaqt li jirċievi l-pensjoni, għadu qed joffri xi ħaġa lis-soċjeta' permezz tax-xogħol. Hu qal li għadu jħossu validu, għandu x'joffri u għalhekk irid jibqa' jagħti kontribut.

Fl-aħħarnett, tkellmet ukoll Rosette Thake, li tmexxi Child Care Centre. Hi appellat biex il-Gvern idaħħal liġi li tirregola ċ-Child Care Centres ta' Malta. Minkejja li hemm regoli dwar dawn iċ-ċentri li daħlu fis-seħħ fl-2006. Hi faħħret ix-xogħol li qed jagħmel il-Gvern mal-Koperattivi ta' pajjiżna, fosthom mal-koperattiva tac-Child Care Centres, u qalet li dawn kienu strumentali biex baqgħu jinħolqu l-impjiegi f'Malta, anke fi żmien ta' riċessjoni.

Il-Prim Ministru ħa nota ta' dawn is-suġġerimenti, u qal li se jkun qed jevalwa kull suġġeriment li tressaq waqt dan id-djalogu, f'aktar dettall.