Inawgurata l-kappella ta' Santa Ċeċilja f'Għawdex wara r-restawr

L-uniku kappella medjevali li tinsab f'Għawdex reġgħet fetħet il-bibien tagħha wara kważi 400 sena wara proġett ta' restawr li sar fl-aħħar snin snin permezz tas-sehem tal-Gvern, ta' għaqda volontarja u ta' kumpanija privata.

 

Il-proġett ġie inawgurat is-Sibt filgħodu minn Giovanna Debono, il-Ministru għal Għawdex. Il-proġett ta' restawr estensiv sar minn Baron Group f'Għawdex kif ukoll minn ħaddiema tal-Ministeru għal Għawdex li wettqu partijiet mix-xogħlijiet. Il-proġett ingħata fondi wkoll minn skema ta' eko-Għawdex għall-għaqdiet mhux governattivi mnedija mill-istess Ministeru, u li permezz tagħha ġew iffinanzjati l-art ġdida tal-injam tal-kappella kif ukoll is-sistemi tad-dawl b'vultaġġ baxx li jinsabu fuq barra u fuq ġewwa tal-kappella.

 

Giovanna Debono, filwaqt li rringrazzjat lil dawk kollha involuti fir-restawr ta' dan il-monument uniku f'Għawdex, spjegat kif il-kappella issa mistennija tiġi mgħoddija f'idejn l-organizzazzjoni mhux governattiva Wirt Għawdex għall-imaniġġjar tagħha permezz ta' ftehim iffirmat bejn il-Ministeru għal Għawdex stess u l-għaqda, li diġa' hi afdata bl-immaniġġjar ta' siti storiċi oħra f’Għawdex li qed tiftaħ b’mod regolari għat-tgawdija tal-pubbliku. Wirt Għawdex segwiet b’mod assidwu l-proċess ta’ esproprijazzjoni, akkwist, restawr u riabilitazzjoni tas-sit tal-uniku kappella medjevali li fadal f'Għawdex. 

 

Giovanna Debono qalet ukoll li l-kollaborazzjoni bejn il-Gvern, il-privat u aġenzija volontarja f'dan il-proġett wassal biex it-tliet partijiet flimkien isalvaw u jagħmlu dan il-wirt storiku ta’ pajjiżna aktar aċċessibbli. Filwaqt li spjegat ir-rwol tal-għaqda volontarja Wirt Għawdex, Giovanna Debono esprimiet il-gratitudni tagħha għall-ħidma tal-Maġistrat Paul Coppini, il-President preċedenti tal-għaqda, li għen biex il-Ministeru jakkwista dan il-monument u biex jibda’ x-xogħol fuq il-Kappella. Hija faħħret ukoll il-ħidma ta' Franco Masini, il-President il-ġdid, u l-għajnuna kontinwa tas-Segretarju Eżekuttiv Giovanni Zammit.