Inawgurata l-Pjazza Żjara tal-Madonna fl-Għarb

Ġiet inawgurata fażi oħra ta' proġett koorindat mill-Kunsill Lokali tal-Għarb li wassal għall-ftuħ ta' proġett ta' tisbiħ tal-Pjazza Żjara tal-Madonna tal-istess lokalita'. Dan il-proġett qed isir b'investiment ta' aktar minn €636,000 b'ko-finanzjament mill-Programm għall-Iżvilupp Rurali għal Malta 2007 – 2013. 

Il-Ministru għal Għawdex, Giovanna Debono, li inawgurat dan il-proġett ta' tisbiħ tal-Pjazza, qalet li permezz ta' dan, se jkomplu jissaħħu l-attrazzjonijiet turistiċi fil-gżira t'Għawdex. Il-Ministru faħħret l-inizjattivi meħuda mill-Kunsill Lokali proattiv tal-Għarb li uża diversi skemi fosthom dawk tal-fondi Ewropej li qed jgħinu biex jintlaħqu ukoll objettivi mat-titjib tal-kwalita' tal-ħajja f'inħawi rurali marbuta m'eko-Għawdex.

Il-Ministru għal Għawdex spjegat ukoll kif l-Għarb ibbenefika wkoll mill-iskema tal-Ministeru għal Għawdex marbuta ma' Eko Għawdex biex jitwettqu progetti oħra fosthom it-twaqqif ta' mużew li fih qed jiġu esposti oġġetti sagri u xogħlijiet artistiċi marbuta mal-istorja tal-parroċċa.

Il-proġett sħiħ ikopri restawr fil-Kappella ta' San Dimitri u dik taż-Żejt, restawr tal-Pont Ta' Sdieri, bini ta' ħitan tas-sejjiegħ u restawr estensiv fil-pjazza prinċipali tal-lokalita'.

 

Ritratt : Il-Ministru għal Għawdex, Giovanna Debono waqt il-ftuħ tal-wirja 'Il-Kult tal-Battista matul iż-Żminijiet' fix-Xewkija.