Joanna MIFSUD
8 ta' Ġunju, 2012
20:40 CET |
Il-membri ta’ Fleetwood Mac u diversi artisti mid-Dinja tar-Rock esprimew niket għat-telfa ta’ Bob Welch, eks kitarrista mal-grupp, li nstab mejjet minn martu fid-dar tagħhom ġewwa Nashville, f’Tennessee.
Rapporti qalu li Welch, li anki kellu suċċess bħala kantant solista, uża arma tan-nar biex jikkommetti suwiċidju u bil-pulizija ssib ‘nota tal-aħħar’ miktuba minnu fir-residenza.
Welch ifforma parti minn Fleetwood Mac bejn l-1971 u l-1974 u telaq qabel il-grupp laħaq ħareġ l-album ‘Rumours’ (fl-1977), li jibqa’ fost l-akbar ‘Top Sellers’ ta’ kull zmien.
Intant, huwa fforma l-grupp tar-Rock Paris u bl-ewwel album tiegħu bħala solista jkun ‘French Kiss’ li tela’ fil-kategorija ta’ Platinum bil- bejgħ konsistenti u li minnu ħarġu ż-żewġ singles klassiċi ‘Sentimental Lady’ u ‘Ebony Eyes’.
Fl-1994, Welch kellu d-diżgwid ma’ eks sħabu ta’ Fleetwood Mac li fittixhom fil-qorti għal royalties li ħass li kien dovut għalihom, iżda lbieraħ il-kantanta (u membru tal-grupp) Stevie Nicks fakkritu bħala ‘kitarrista mill-aqwa’ u bid-drummer Mick Fleetwood jinsisti li Welch kien ‘parti kbira mill-istorja tagħhom’.
Il-mewt ta’ Bob Welch, fl-età ta’ 66 sena, issegwi dik ta’ Bob Weston, eks kitarrista ieħor ma’ Fleetwood Mac, li kien seħħ proprju f’Jannar li għadda.
|
sezzjoni: internazzjonali
Ċentri tas-saħħa
