15 ta' Marzu, 2012
13:37 CET |
Il-Parlament Ewropew approva riżoluzzjoni li sejjaħ għal iktar azzjoni fil-ġlieda kontra d-diabete - riżoluzzjoni li ħadmu fuqha għal dawn l-aħħar erba' snin erba' membri tal-Parlament Ewropew, fosthom l-MEP Nazzjonalista Simon Busuttil, li kien Co-Chairman tal-grupp.
Ir-riżoluzzjoni, li ssejjaħ lill-Kummissjoni Ewropea biex tniedi strateġija Ewropea dwar id-diabete, kienet approvata b'maġġoranza kbira.
F'intervent li għamel wara li ttieħed il-vot, Simon Busuttil appella lill-Kummissjoni Ewropea u lill-Istati Membri biex jadottaw strateġija dwar id-diabete kemm fuq livell nazzjonali kif ukoll fuq livell Ewropew.
Hu qal li fl-Unjoni Ewropea, iktar minn 32 miljun persuna huma affetwati minn din il-kundizzjoni u 32 miljun oħra jistgħu jiġu milquta minnha.
Simon Busuttil qal li b'kura adattata, ħafna minn dawn il-persuni jistgħu jgħixu ħajja normali. Iżda ħafna drabi, din il-kundizzjoni tinstab fi stadju avvanzat, b'kumplikazzjonijiet fuq is-saħħa ta' dawn il-pazjenti.
L-MEP Nazzjonalista qal li m'hemm l-ebda skuża ta' spejjeż hekk kif l-ispiża tas-saħħa fuq l-istati membri tkun ferm ikbar jekk ma jsir xejn.
Il-Kummissarju Ewropew għall-Iżvilupp Andris PIelbags qal li l-Kummissjoni se tanalizza din ir-riżoluzzjoni biex takkomoda t-talba tal-Parlament Ewropew biex issir iktar ħidma fil-ġlieda kontra d-diabete.
|
sezzjoni: Ewropa
Ċentri tas-saħħa
