31 ta' Jannar, 2008
13:55 CET |
Il-Kummissjoni Ewropea ddeċidiet li tiftaħ kawża kontra Malta quddiem il-Qorti Ewropea tal-Ġustizzja dwar il-Kaċċa għall-Gamiem u s-Summien fir-Rebbiegħa. Il-Kummissjoni se titlob ukoll lill-Qorti Ewropea biex l-istaġun tal-Kaċċa fir-Rebbiegħa li jmiss ma jiftaħx. Id-deċiżjoni meħuda mill-Kummissjoni Ewropea waqt laqgħa li saret il-bieraħ tħabbret fi Brussell il-lum.
Il-Kummissarju Ewropew responsabbli mill-Ambjent Stavros Dimas qal li hu minnu li Malta kisbet deroga fin-negozjati għas-sħubija u li din id-deroga tħalli l-Kaċċa f'dan iż-żmien tas-sena. Madankollu, d-deroga tgħodd biss sakemm ma jkunx hemm żmien ieħor meta tista' ssir Kaċċa fuq l-istess għasafar. Iżda miċ-ċifri li rċeviet l-Unjoni Ewropea mingħand il-Federazzjoni tal-Kaċċaturi Maltin stess, jirriżulta li hemm żmien ieħor meta tista' ssir Kaċċa fuq il-Gamiem u s-Summien, u dan hu l-Ħarifa. Għaldaqstant id-deroga ma tgħoddx, qed tinsisti l-Kummissjoni Ewropea.
Il-Kummissjoni Ewropea qed targumenta li dan ikompli jissaħħaħ bi żviluppi li kienu seħħew wara li Malta daħlet fl-Unjoni Ewropea, meta f'kawża kontra l-Fillandja sentejn ilu l-Qorti Ewropea kienet qatgħetha li ma setgħetx issir Kaċċa fir-Rebbiegħa la din setgħet issir - anke jekk f'numri iżgħar - fil-Żarifa. Fil-fatt, il-Fillandja ċediet il-każ tagħha wara din id-deċizjoni tal-Qorti. Anke Ċipru ċeda wara li kien fetaħ l-istaġun tar-rebbiegħa s-sena l-oħra, u din is-sena Ċipru mhux se jiftaħ l-istaġun.
Il-Kummissjoni Ewropea qalet ukoll li se titlob lill-Qorti Ewropea biex, sakemm tinqata' l-kawża, l-Qorti toħroġ mandat ta' inibizzjoni biex il-Gvern Malti - lanqas jekk irid - ma jkunx jista' jiftaħ l-istaġun tal-Kaċċa fir-Rebbiegħa li ġejja. Il-Qorti Ewropea mistennija tiddeċiedi jekk il-Gvern Malti jiftaħx l-istaġun tal-Kaċċa fir-Rebbiegħa qabel id-data tal-ftuħ ta' l-istaġun li jmiss, jiġifieri sa Marzu.
Fid-deċiżjoni tagħha l-Kummissjoni Ewropea għamlitha ċara li Malta m'hi se teħel ebda multa, anke jekk titlef il-kawża quddiem il-Qorti Ewropea. Multa jkun hemm biss jekk, wara li l-Qorti taqta' l-kawża, Malta ma tobdiex id-deċiżjoni tal-Qorti Ewropea.
|
