Ray ABDILLA
30 ta' Lulju, 2010
17:01 CET |
Il-Prim'Awla tal-Qorti ċivili preseduta mill-Imħallef Giannino Caruana Demajo ordnat lill-kumpanija tal-ajru British Airways tħallas is-somma ta' 222,926 ewro lil James Stagno Navarra, eks-impjegat tagħha, bħala kumpens wara li waqqfitlu ħesrem l-kuntratt li kellu magħha.
Il-linja tal-ajru Ingliża kienet topera minn u lejn Malta iżda b'effett mill-31 ta' Marzu 1989 iddeċidiet ma tibqax topera titjiriet bi skeda lejn pajjiżna. Fid-9 ta' Diċembru 1988 hija laħqet ftehim mal-ħaddiema dwar il-ħlas li kellhom jingħataw jiġifieri 1/8 tal-paga fix-xahar għan-numru ta' xhur li damu jaħdmu magħha.
Fl-istess waqt il-linja tal-ajru żammet wieħed mill-impjegati, James Stagno Navarra, biex b'effett mill-1 ta’ April 1989 jaħdem magħha bħala Sales Manager. Skont ittra datata 13 ta' Frar 1989, jekk l-impjieg ta' Stagno Navarra kellu jieqaf huwa kellu jingħata ħlas simili għal tal-ħaddiema l-oħra.
Sadanittant l-British Airways ftit tas-snin ilu kienet reġgħet bdiet taħdem minn u lejn Malta iżda reġgħet waqfet. B'ittra datata 14 ta' Settembru 2009 il-British Airways infurmat lil Stagno Navarra li l-impjieg tiegħu kien se jieqaf b'effett mill-31 t'Ottubru tal-istess sena u li kienet se tagħtih 1/8 tal-paga li kellu fix-xahar għal kull xahar li kien ilu jaħdem magħha sa massimu ta' 200 xahar.
Stagno Navarra ma qabilx ma' din l-offerta u f'Settembru 2009, talabha biex tħallsu 1/8 tal-paga li kellu fil-31 ta' Ottburu 2009 għal 425 xahar. Iż-żewġ naħat baqgħu ma qablux u f'Novembru li għadda, l-eks-impjegat ħa lill-linja tal-ajru Ingliża fil-qorti Maltija. Stagno Navarra ngħata bil-Qorti tordna li l-British Airways tħallsu s-somma li talabha jiġifieri 222,926 ewro bħala kumpens għat-terminazzjoni tal-impjieg.
|
