19 ta' Ġunju, 2012
19:18 CET |
Matul il-jum tat-Tlieta il-Ministru għall-Finanzi, l-Ekonomija u l-Investiment Tonio Fenech żar il-Kumpanija Microtek Medical Malta Ltd. li hi parti minn kumpanija oħra Amerikana, Ecolab.
Din il-kumpanija tipproduċi prodotti li jintużaw fil-qasam mediku, bħal prodotti li jipprevjenu infezzjonijiet, u għoddod kirurġiċi fost prodotti oħra. Ħafna mill-prodotti li tipproduċi Microtek jiġu esportati lejn pajjiżi Ewropej, u anke lejn il-Lvant Nofsani u l-Ġappun.
F'dawn l-aħħar snin Microtek kompliet tespandi, tant li fl-aħħar sentejn żiedet l-impjiegi tagħha biex llum tħaddem kważi 90 persuna.
Il-Ministru Tonio Fenech sostna li dan kien possibbli grazzi għall-għajnuna li l-Gvern permezz tal-Malta Enterprise offra, fosthom l-iskema ta' għajnuna għall-investiment, kif ukoll għajnuna għat-twaqqif tad-dipartiment tar-riċerka u l-iżvilupp.
Il-Ministru kompla jgħid li l-Gvern permezz tal-Malta Enterprise approva 38 miljun ewro f'tnaqqis mit-taxxi bħala għajnuna għall-investiment favur l-industrija.
Is-suċċess ta' Microtek jirrappreżenta l-fatt li s-settur tal-manifattura qed jibqa' jikber f'pajjiżna, u dan kompla jgħid il-Ministru, qed narawh mill-fatt li qed jiżdied l-investiment, l-esportazzjoni u l-impjiegi.
L-investiment fl-ewwel kwart tas-sena żdied b'5% filwaqt li l-Eurostat, l-uffiċċju nazzjonali tal-istatistika tal-Unjoni Ewropea, kkonfermat li bejn Jannar u Marzu Malta kellha żieda ta' 9% fl-esportazzjoni. Dan qed jirifletti ruħu wkoll f'żieda fl-impjiegi, hekk kif fl-ewwel kwart ta'din is-sena pajjiżna kellu waħda mill-aqwa żidiet fil-ħolqien tal-impjiegi.
|
sezzjoni: aħbarijiet lokali
Ċentri tas-saħħa
