Id-diskors ta' Debono Grech hu konferma ta' kemm l-MLP ma nbidilx

Il-membri, kandidati u uffiċjali tal-MLP qed jikkonfermaw kemm il-politika tal-MLP għadha dik li kienet 30 sena ilu, taħt it-tmexxija ta' Duminku Mintoff. L-MLP u l-esponenti tiegħu, fosthom id-Deputat Joe Debono Grech, għadhom jżebilħu bil-festa tal-Indipendenza kif kienu jagħmlu tletin sena ilu.

Dan qalu d-Deputat Nazzjonalista Beppe Fenech Adami, li hu wkoll Assistent Parlamentari tal-Ġustizzja u l-Intern waqt il-programm Newsdesk fuq Radio 101 it-Tlieta waranofsinhar. Beppe Fenech Adami qal li d-differenza bejn il-Partit Nazzjonalista u l-Malta Labour Party ħarġet fiċ-ċar fl-aħħar jiem b'dak li qal il-Kelliem Ewlieni tal-MLP Joe Debono Grech, li qal li l-Indipendenza hi festa tan-Nazzjonalista. Din hi konferma li l-MLP għadu dak li kien, għall-kuntrarju tal-Partit Nazzjonalista li dejjem ħadem biex għamel akkwisti għal Malta kollha u mhux għan-Nazzjonalisti biss. 

Beppe Fenech Adami fakkar li l-Gvern Soċjalista ta' Duminku Mintoff kien neħħa l-Indipendenza minn festa pubbliku, u kellu jkun hemm il-Partit Nazzjonalista fil-Gvern biex din il-festa reġgħet bdiet tiġi ċċelebrata mill-poplu Malti u Għawdxi. 

Beppe Fenech Adami appella l-poplu Malti u Għawdxi biex jiżen dak li qed jiproponu ż-żewġ partiti, kif ukoll x'wettqu ż-żewġ partiti politiċi meta ngħataw il-fiduċja tal-istess poplu. 

L-Assistent Parlamentari fakkar li l-akbar bidliet li seħħu f'Malta kellhom il-Partit Nazzjonalista bħala l-arkitett tagħhom, b'mod speċjali fis-setturi tax-xogħol, l-edukazzjoni u s-saħħa. Hu qal ukoll li anke l-MLP prova jbiddel, iżda l-bidliet li għamel l-MLP bagħtuna lura mhux 'il quddiem. Eżempju ċar seħħ bejn l-1996 u l-1998, meta bat lill-istudenti jiddejnu, meta ġab rekord ta' qgħad, u ġab bidla għall-agħar fil-qasam tas-saħħa. Għalhekk, il-poplu għandu kull dritt li jistenna l-bidla mill-politiċi, iżda din il-bidla għandha tkun biss fid-direzzjoni t-tajba u mhux lura, kif irid il-Malta Labour Party.