Aġġornata
Grupp ta' 114-il immigrant jiddaħħlu Malta

Għall-ħabta tal-ħamsa ta' waranofsinhar, f'pajjiżna wasal grupp ta' immigranti li kien jinsab fuq dinghy li kien interċettat mill-Forzi Armati ta' Malta madwar 50 mil nawtiku fin-Nofsinhar ta' Ħad-Dingli. 

B'kollox, il-grupp kien magħmul minn 114-il immigrant – li minnhom 38 huma nisa bi ftit minnhom tqal u 75 raġel. Fuq id-dinghy kien hemm ukoll tarbija. Persuna waħda ttieħdet l-isptar Mater Dei b'ambulanza għall-kura meħtieġa, bil-bqija tal-immigranti jitilqu bil-coaches tal-Pulizija. 

L-immigranti, li qed jgħidu li huma mis-Somalja, iddaħlu fix-Xatt it-Tiben fil-Furjana abbord il-patrol boat tal-Forzi Armati ta' Malta, P-52. 

Il-ħidma tas-salvataġġ għal dawn l-immigranti bdiet fis-sigħat bikrin ta' dalgħodu.