Għawdex ippremjata għall-kwalita' tal-kosta

Għawdex ġie ppremjat għall-kwalita' tal-kosta, din id-darba bil-Quality Coast Award. Għawdex ingħatat dan it-titlu prestiġjuż hekk kif ikklassifikat fit-tielet post fost mitt destinazzjoni kostali fl-Ewropa magħżula bħala l-aqwa destinazzjoni turistiċi sostenibbli. 

L-iskop ta' dawn il-Quality Coast Awards hu li jippromwovu destinazzjonijiet kostali li joffru veduti u pajsaġġi naturali b'identita' lokali, b' wirt naturali u dak kulturali kif ukoll b' ambjent marittimu nadif. 

Dawn l-awards jiggwidaw ukoll operaturi turistiċi sabiex jirreklamaw destinazzjonijiet sostenibbli bħal ma huwa Għawdex. 

Din is-sena, l-Coastal & Marine Union evalwat mat-tmien mitt destinazzjoni biex imbagħad intagħżlu l-aqwa mija, bl-Azores fil-Portugal jikklassifika fl-ewwel post, Lerapetra fil-Greċja fit-tieni post u Għawdex fit-tielet post. 

Il-Ministru għal Għawdex Giovanna Debono ġiet ippreżentata b'ċertifikat u bandiera bħala simbolu ta' dan il-premju.

Giovanna Debono fissret dan l-unur bħala rikonoxximent għal dak kollu li qed isir f'Għawdex. Il-Ministru fissret ukoll illi l-kriterji tal-Quality Coast Award jaqblu perfettament mall-kriterji u l-viżjoni ta' Eko-Għawdex.