Festival tal-Fjuri u l-Mużika

Il-fjuri kkuluriti huma fost l-aspetti tar-Rebbiegħa li jispikkaw u dan deher biċ-ċar fil-Festival ta' fjuri u mużika li l-Kunsill Lokali tan-Naxxar organizza għall-ewwel darba f'waħda mill-iktar toroq traffikużi tal-lokalita li ngħalqet għat-traffiku apposta  għal din l-attivita`.

Is-Sindku tan-Naxxar, Maria Deguara fetħet dan il-Festival fil-preżenza tal-Ministru għar-Riżorsi u l-Affarijiet Rurali George Pullicino u l-Ministru għat-Turiżmu, il-Kultura u l-Ambjent, Mario de Marco. Is-Sindku semmiet kif għal din l-attivita għandha titwaħħal siġra tat-34U. 

Fuq l-istess tema, il-Ministru George Pullicino qal li f'dawn l-aħħar ftit snin f'Malta tħawlu mal-115-il elf siġra mhux mill-Gvern biss iżda anke mill-familji u azjendi fost oħrajn. Żied jgħid ukoll li n-Naxxarin biss ħawlu mal-400 siġra.

Il-Ministru Mario de Marco tkellem mil-lat turistiku u  semma kif din il-lokalita` partikolari, li għandha elementi storiċi, kummerċjali, ambjentali u kulturali qed tilqa' aktar nies lejha, anke permezz ta' festivals bħal dawn li jagħmlu lokalita mhux assoċjata mat-turiżmu, imfittxija mill-barranin.

Għal dan il-festival iż-żewġ baned tar-raħal daqqew siltiet mużikali madwar ir-raħal. Kien hemm ukoll il-parteċipazzjoni tal-Johann Strauss School of Music kif ukoll parteċipazzjoni ta' talenti lokali, bil-qofol tal-festival mużikali jkun l-għeluq mill-kantant Kurt Calleja.