Matthew BONETT
13 ta' Mejju, 2012
12:05 CET |
L-aqwa rigal li tista' tirċievi l-omm hu li tara lil uliedha jirnexxu lkoll. Dan hu l-iskop tal-Partit Nazzjonalista. Li nirnexxu lkoll flimkien. U peress li uliedek huma l-ġejjieni ta' pajjiżna, uliedek huma speċjali għalina. Għalhekk, se nkomplu ntuhom ġejjieni mill-isbaħ u ta' suċċess.
Dan kien il-messaġġ tal-Prim Ministru u l-Kap tal-Partit Nazzjonalista Lawrence Gonzi waqt djalogu li sar barra l-Park tal-Avjazzjoni f'Ħal Safi, bit-tema Fiduċja Fik u Uliedek. Djalogu li kien immexxi minn Joe Farrugia, li minbarra li hu d-Direttur Ġenerali tal-Assoċjazzjoni ta' Min Iħaddem, hu wkoll il-President tal-MCAST.
Il-Prim Ministru rabat il-messagg tiegħu mal-okkażjoni ta' Jum l-Omm.
Jum l-Omm wasal fi tmiem ġimgħa importanti ħafna għall-Gvern. Ġimgħa li matulha, l-Fond Monetarju Internazzjonali ddeskriva l-ekonomija Maltija bħala waħda impressjonanti, u l-Kummissjoni Ewropea bassret li l-ekonomija Maltija se tkun fost l-aqwa fl-Ewropa sal-aħħar tas-sena. U l-Parlament Malti approva l-miżuri tal-baġit li jfisser li l-Gvern jista' jkompli jaħdem biex joħloq ix-xogħol f'pajjiżna.
Il-Prim Ministru tkellem ukoll dwar l-edukazzjoni li qed jieħdu ż-żgħażagħ Maltin.
Il-Prim Ministru tkellem ukoll dwar qasam importanti fl-edukazzjoni. Ir-riċerka u l-innovazzjoni.
Lawrence Gonzi qal ukoll li l-Gvern Malti applika biex jakkwista fondi mill-Unjoni Ewropea biex iċ-Ċentru ta' Bighi jinbidel f'ċentru miftuħ dwar ix-xjenza u t-teknoloġija għat-tfal Maltin kollha.
Il-Prim Ministru qal li l-paga medja fl-aħħar erba' snin żdiedet b'2,000 ewro. Waqt li dik minima żdiedet b'1,000 ewro.
Dwar l-anzjani, l-Prim Ministru qal li l-inċentiv tal-Gvern biex dawk li jirċievu l-pensjoni jibqgħu jahdmu, sar popolari ferm.
U fil-baġit ta' din is-sena, l-Gvern ħaseb f'dawk ukoll li għandhom aktar minn 80 sena u jgħixu fi djarhom. Li qed jirċievu għotja ta' 300 ewro.
Fl-aħħarnett, il-Prim Ministru tkellem ukoll dwar l-etika ġurnalistika. U appella biex il-ġurnaliżmu ma jibqax jinbidel f'attakki personali saħansitra fuq il-qraba tal-politiċi, iżda dwar l-argumenti politiċi.
|
sezzjoni: aħbarijiet lokali
Ċentri tas-saħħa
