Aktar titjib fl-iżbilanċ fil-finanzi tal-Gvern

Statistika tal-NSO ippubblikata llum turi li l-iżbilanċ fil-finanzi pubbliċi fi tmiem is-sena l-oħra kien fil-livell ta' 219-il miljun ewro.

Dan ifisser tnaqqis ta' aktar minn sittin miljun ewro fuq is-sena ta' qabel, l-2010.

Iċ-ċifri tal-Uffiċċju Nazzjonali tal-Istatistika juru li dan it-titjib fid-differenza bejn il-ħruġ u d-dhul tal-Gvern seħħ minħabba li ż-żieda fid-dħul tal-Gvern kienet ferm akbar miż-żieda fl-infiq.

Fil-fatt, tgħid l-istatistika, tul l-2011 kien hemm żieda fid-dħul tal-Gvern ta' aktar minn 119-il miljun ewro, meta mqabbel maż-żieda ferm inqas ta' 58 miljun fin-nefqa. Waqt li d-dħul tal-Gvern żdied b'5%, in-nefqa tal-Gvern żdiedet biss bi 2%.

B'hekk, bejn Jannar u Diċembru 2011, id-dħul tal-Gvern kien jammonta għal total ta' €2,644 miljun waqt li l-ħruġ kien jammonta għal €2,862 miljun – differenza, jew żbilanċ ta' €219-il miljun. Meta dan l-iżbilanċ fl-istess perjodu sena qabel kien ta' €279 miljun.