89% tal-istudenti Għawdxin jagħżlu li joqgħodu f'Malta matul il-ġimgħa biex jistudjaw

89 fil-mija tal-istudenti Għawdxin f'Malta jagħżlu li joqogħdu flimkien ma’ sħabhom f’appartamenti f’Malta matul il-jiem tal-ġimgħa u jirritornaw Għawdex fi tmiem il-ġimgħa. Il-11 fil-mija l-oħra jaqsmu bejn iż-żewġ gżejjer kuljum jew b’mod regolari. 

Stħarriġ li sar mill-Grupp Universitarji Għawdxin (GUG) fost l-istudenti Għawdxin f'Malta jagħti indikazzjoni ċara li ż-żgħażagħ Għawdxin għandhom determinazzjoni u minkejja li ħafna minnhom qed jgħixu ħajja aktar indipendenti, għadhom jgħożżu l-valur tal-familja u r-reliġjon filwaqt li japprezzaw il-karatteristiċi ta’ Għawdex. 

L-istħarriġ sar fost 405 studenti li jirrappreżentaw kważi 40 fil-mija tal-istudenti Għawdxin kollha li qed ikomplu bl-istudji tagħhom f’Malta, jiġifieri madwar 1,000 li qed isegwu korsijiet fl-Università ta’ Malta u kważi 200 oħra li jattendu ċ-ċentri tal-MCAST u l-ITS f’Malta. 

L-istħarriġ tnieda waqt konferenza li saret fil-Kampus tal-Università f’Għawdex li għaliha attendew fost l-oħrajn il-Ministru għal Għawdex Giovanna Debono u l-kelliem tal-Oppożizzjoni għal Għawdex Anton Refalo.

Giovanna Debono faħħret l-inizjattiva meħuda mill-GUG u filwaqt li fissret kif fl-aħħar snin il-Gvern baqa’ jagħti prijorità lill-qasam edukattiv, spjegat kif dan irriżulta wkoll f’żieda sostanzjali fl-istudenti Għawdxin li qed ikomplu bl-istudji terzjarji jew vokazzjonali f’Malta. 

Il-Ministeru għal Għawdex nieda skema marbuta ma’ għajnuna addizzjonali biex jittaffew parti mill-ispejjeż li jidħlu għalihom familji Għawdxin biex uliedhom ikomplu jistudjaw f’Malta. Giovanna Debono qalet li minn din is-sena l-għajnuna ser tiżdied għal €400 kull tliet xhur u ser tingħata lil kull student mingħajr id-distinzjoni li s'issa kienet issir bejn studenti universitarji u studenti f’istituzzjonijiet oħrajn.