foreign@media.link.com.mt
20 ta' Lulju, 2010
19:42 CET |
L-Unjoni Ewropea reġgħet ċanfret lir-Rumanija talli mhix qed tagħmel biżżejjed biex telimina l-korruzzjoni fl-ogħla istituzzjonijiet tal-Gvern. Fl-istess ħin, il-Bulgarija kienet imfaħħra għall-progress li qed tagħmel kontra l-korruzzjoni.
Fir-rapport annwali dwar dawn iż-żewġ pajjiżi membri, il-Kummissjoni Ewropea qalet li l-politiċi fir-Rumanija ma kellhomx ir-rieda li jintroduċu riformi kontra l-korruzzjoni. Xi ħa;a li kienet qed tpoġġi lil dan il-pajjiż fi ksur tal-irbit li kien għamel qabel ma sar membru tal-UE.
Fi stqarrija, il-Kummissjoni qalet li filwaqt li l-Bulgarija kienet ħaddnet ir-riformi u kisbet riżultati importanti, fir-Rumanija dan ma kienx il-każ u kien hemm nuqqasijiet serji.
Il-Bulgarija u r-Rumanija tpoġġew taħt skrutinju speċjali minn mindu saru membri tal-UE fl-2007 minħabba t-tħassib ta' ħafna dwar il-korruzzjoni u l-kriminalità organizzata f'dawn il-pajjiżi, fatturi li qed igerrxu l-investiment fil-pajjiż u jagħmilha aktar diffiċli biex dawn jegħlbu l-problemi ekonomiċi li għandhom.
Il-Kummissjoni kienet partikolarment irritata minn liġi ġdida Rumena li biha aġenzija kontra l-korruzzjoni spiċċat kważi totalment mingħajr poteri.
Ir-rapport iħeġġeġ lit-Rumanija biex issaħħaħ il-qrati, li jitqiesu ineffiċjenti, tieħu passi konkreti lejn il-prosekuzzjoni ta' korruzzjoni fil-livelli għolja tal-Gvern u ittejjeb il-mod kif jinħarġu t-tenders tal-Gvern.
Din kienet l-ewwel darba li r-rapport annwali tal-Kummissjoni akkuża l-klassi politika Rumena li kienet nieqsa mill-ħeġġa biex tiġġieled il-korruzzjoni. Il-Kummissjoni qalet li għalissa ma kinitx se tieħu passi kontra l-pajjiż.
|
