Hollande jieħu l-ġurament

Francois Hollande, f’Pariġi, ħa l-ġurament bħala l-ewwel President Soċjalista ta’ Franza fi sbatax-il sena u f’diskors inawgurali qal li se jipprova jemenda patt Ewropew b’mod li jinkorpora l-miżuri li jistimulaw l-iżvilupp flimkien ma’ politika għal tnaqqis tal-iżbilanċ.

Qabel id-diskors, Hollande intlaqa’ mill-eks President Nicolas Sarkozy fuq it-taraġ tal-Palazz Presidenzjali Elysee fejn sar it-trasferiment ta’ poter formali li jinkludi l-kodiċi nukleari tal-pajjiż u dossiers  sigrieti oħra. Il-President qal li se jaċċerta li l-Parlament jaqdi r-rwol sħiħ u waqt li jrid ifassal il-prioritajiet tenna li mhux se jiddeċiedi għal kulħadd, u fuq kollox.

Intant, Hollande  illejla mistenni  jagħti l-ewwel konferenza tal-aħbarijiet bħala President Franċiż f’Berlin, il-kapitali tal-Ġermanja, fil-preżenza tal-Kanċillier Ġermaniż Angela Merkel. Dan meta s-swieq finanzjarji se jsegwu b’interess l-ewwel jiem tat-tmexxija ta’ Hollande, li jeħtieġ iserraħ l-irjus li l-politika tiegħu m’għandhiex tgħarraq ir-relazzjonijiet ma’ Merkel.

Kwalunkwe indikazzjonijiet dwar il-politika ekonomika ta’ Pariġi għandhom ikunu analizzati fi Franza u lil hinn minnha, b’Hollande innifsu jgħid li jeħtieġu jiġġudikawh skont kif tibda u tiżvolġi l-Presidenza tiegħu.