Ġlieda f'Birkirkara

Dalghodu għal ħabta tal-ħamsa nieqes kwart (0445hrs), ġewwa Triq il-Kbira, Birkirkara seħħet ġlieda bejn grupp ta’ żgħażagħ.

Minn investigazzjoniet preliminari jidher li xi persuni kellhom argument f’post ta’ divertiment.  Dan l-argument baqa’ sejjer tant li l-persuni nvoluti spiċċaw isegwu lil xulxin bil-vetturi.  Malli dawn waslu fit-triq imsemmija propju quddiem l-Għassa tal-Pulizija ta’ Birkirkara, il-ġlieda eskalat u fil-fatt kompliet ġewwa l-istess għassa.

Matul il-ġlieda msemmija saru xi ħsarat fuq computers kif ukoll oġġetti oħra li jinsabu fl-Għassa tal-Pulizija.  Mill-persuni nvoluti, ġuvni ta’ 20 sena residenti San Pawl il-Bahar ittieħed l-Isptar Mater Dei fejn ġie ċċertifikat li sofra ġrieħi ta’ natura gravi.  Il-qagħda tiegħu hija waħda stabbli.

żewġ ġuvintur li kienu wkoll involuti f’din il-ġlieda qegħdin jinżammu mill-Pulizija għal aktar stħarriġ.

Il-Pulizija għadha għaddeja bl-investigazzjonijet fuq dan il-każ.